Кому му е гајле за жените во Америка?

Ovaj tekst možete čitati i u prevodu Irene Šentevske

***

Дента пред американските избори и неколкуте што следеа ги поминав разговарајќи со повеќе пријатели во САД. Кај нив посведочив страв и неизвесност на кои сме навикнати на Балканот со речиси секои избори, што за нив е необично.

Иако дел од јавноста (на социјалните мрежи) се обидуваше да го релативизира стравот на Американците, кои тврдеа дека овие избори се историски во Америка, факт е дека толку очигледно фашистичка реторика насочена против правата на жените и имигрантите не била досега присутна на американската политичка сцена.

За илустрација, еве неколку од пораките што ги добив ноќта пред изборите: „Многу сум депримирана. Нема ништо да гледам. Ќе си земам апче и ќе си легнам. Многу се плашам“, ми напиша пријателка од Феникс.

Еден оптимистичен пријател од Флорида кој обично не се интересира во политика ми го напиша следното: „Да се разбудиме во понежна Америка, а не во Четвртиот Рајх“. Колешка од Џорџија ми испрати мејл: „Веќе поминав низ сите фази на тажење, па сега само чекам ова да се заврши“.