За Епстин, Чомски, левицата и жените

Ovaj tekst možete čitati i na  prevodu na srpski jezik.

***

Деновиве по социјалните мрежи гледам разни лево-ориентирани мажи како го изразуваат својот шок поради информациите што излегуваат заедно со цензурираните досиеја за Епстин. Најмногу се вознемирени околу појавата на Ноам Чомски, кој го гледаме во муабет со силувачот и педофил Џефри Епстин, но и со фашистичкиот идеолог Стив Банон. Покрај Чомски, второто изненадување е за појавата на Бил Гејтс на фотографиите, и тој од некои луѓе сметан за своевиден прогресивец.

Наводно, луѓето не се толку изненадени од појаувањето на Бил Клинтон и Вуди Ален на овие слики – нивното сексуално предаторство одамна е нормализирано од страна на јавноста, па нема тука што многу да се дискутира. Сепак, на страна очигледната диверзија со која ваквиот чин сака да го замачка пријателството на Трамп со Епстин, како и потврдата, по којзнае кој пат, дека Трамп е сексуален предатор.

Да позборуваме за тоа како наеднаш гледаме освестување дека околу себе педофилот Епстин собирал и лево, и десно ориентирани мажи, и дека со децении никој ништо не кажал во врска со тоа.

Пред феминизмот културата на харемот полн со мали девојчиња беше прифатлив, и тоа на цивилизациско ниво. Деновиве интензивно ја читам египетската феминистка Навал Ел Садави (Nawal El Saadawi) па ќе се послужам со нејзините зборови поради јасноста со која ги слика феномените што ни се одамна познати: „Меѓу сите видови на имот што мажот сака да ги заштити, жената е на прво место“ (во Скриеното лице на Ева).