Серена Вилијамс и цената на среќата

Ovaj tekst možete čitati i u prevodu

***

Неодамна тенисерката Серена Вилијамс на светот му разоткри дека ослабела 14 килограми со помош на “GLT-1” (глукагонолид пептид 1), или народски, состојката што стои зад лекот за дијабетес Оземпик. Начинот на кој јавноста го доби ова откровение наликуваше на аутирање: сега ќе ви признаам нешто што вие го сметате за срамно, а всушност не е, и со голема гордост ќе ви ја плеснам вистината во лице.

По тоа „аутирање“ Вилијамс се појави и на ток-шоу на ЕнБиСи и зборуваше за наводната дестигматизација на нешто што е вистинско, нормално, научно и позитивно, а и на својот Инстаграм профил ни најави дека во следниот период ќе дознаеме многу повеќе за нејзиното „патешествие“ (journey, популарен лигав збор што има за цел да покаже дека сечие искуство, без разлика колку е безначајно, е некаква-си одисеја).

Разоткривањето на „тајната“ на Серена Вилијамс на извесен начин е очекувано. Веќе некое време нејзиниот личен Инстаграм профил е преплавен со фотографии во кои таа позира како модел и е видно ослабена. Прашањето што јас си го поставив гледајќи ја, како и една цела друга група луѓе, беше: зошто?

Серена Вилијамс е една од најголемите спортисти на светот. Како црна жена во белиот свет на тенискиот спорт, со својот изглед, пркос и отпорност беше инспирација за жени низ целиот свет, да не зборувам за девојчињата со црна боја на кожата. Зарем е можно по сиот успех како една од најголемите тенисери (и машки и женски) да дознаеме дека најбитно од сѐ ѝ е да биде слаба? Зарем и големата Серена Вилијамс е жртва на патријархалната матрица што жената ја сведува само на надворешниот изглед, на лушпа без суштина? „Најбитно е да биде среќна“ или нешто во таков стил велеа луѓе под коментарите.

Но која е цената на „среќата“ на Серена Вилијамс и сите други жени што таа ќе ги охрабри да брцаат инјекции во стомакот за да бидат слаби и да не чувствуваат глад?